A Comisión Europea instou a actuar contra as "constantes ameazas" sobre as redes de telecomunicacións mundiais xa que, segundo afirmou, existen entre un 10% e un 20% de probabilidades de que se produza unha seria caída do sistema nos próximos dez anos.

Desastres naturais, fallos nos equipos informáticos, rotura dos cables submarinos, terrorismo ou ataques cibernéticos son algúns dos perigos que poden causar trastornos no sistema de telecomunicacións mundial, cuxo custo potencial está estimado en 193.000 millóns de euros, asegurou o executivo comunitario.

Por iso, a comisaria europea de Sociedade da Información, Viviane Reding, recalcou a importancia de deseñar unha estratexia común e coordinada para loitar contra este problema.

"Non debe existir ningún elo débil na seguridade cibernética europea", recalcou a comisaria, dado que, ao seu xuízo, as redes e os servizos de comunicación electrónica son a columna vertebral da economía europea.

En 2007, o 93% das empresas europeas utilizaban activamente Internet e o 51% dos cidadáns da UE.

Os ataques a grande escala sufridos nos últimos tempos polas redes cibernéticas en Estonia, Lituania e Xeorxia son unha proba, segundo Bruxelas, da "constante ameaza" que pende sobre estas infraestruturas vitais.

Entre as principais accións formuladas pola comisión, a prevención e a preparación ocupan o eixe principal deste plan, xunto co desenvolvemento dun sistema de alerta e de información europeo que facilite a detección e a resposta a estes perigos.

Unha maior cooperación entre os Estados membros e tamén a nivel internacional, o establecemento das prioridades europeas para garantir a estabilidade a longo prazo de Internet e a consolidación dos criterios de seguridade das infraestruturas do sector figuran tamén entre as actuacións propostas por Bruxelas.