Os enxeñeiros informáticos, invitados a formar parte do colectivo mundial de enxeñeiros

A presidenta da FMOI réunese na Facultade cos representantes dos colexios e facultades de informática.

Logotipo da Universidade Politécnica de Madrid (UPM).A presidenta electa da Federación Mundial de Organizacións de Enxeñaría (FMOI ou WFEO en inglés), María Jesús Prieto-Laffargue, invitou hoxe ao colectivo de enxeñeiros de informáticos, reunidos na Facultade de Informática da Universidade Politécnica de Madrid, a integrarse na FMOI. Propuxo a este colectivo, formado por representantes das facultades de informática de España, dos colexios e asociacións profesionais, integrar unha única entidade representativa que sexa a que presente a súa candidatura a formar parte da FMOI en calidade de asociado, prometendo a defensa persoal desta candidatura na reunión do Comité Executivo que terá lugar o próximo decembro en Brasília.

A FMOI, creada en 1968 baixo os auspicios da UNESCO, é unha organización internacional non gobernamental que agrupa a organizacións de enxeñeiros de máis de 93 países, representando uns 20 millóns de enxeñeiros de todo o mundo. A súa principal función é cooperar con institucións profesionais nacionais e internacionais para desenvolver e aplicar a enxeñaría en beneficio de todo o mundo. Na actualidade os enxeñeiros informáticos españois non exercen representación ningunha na FMOI.

A enxeñaría informática no mundo

María Jesús Prieto-Laffargue pronunciou unha conferencia ante medio centenar de representantes profesionais da enxeñaría informática, na que analizou a situación da enxeñaría informática no marco da enxeñaría mundial. A conferencia foi seguida dun coloquio e dun xantar. Durante a súa intervención, explicou que a FMOI se propón colaborar cos gobernos coa finalidade de favorecer a mobilidade e o intercambio dos enxeñeiros a nivel global.

A presidenta electa da FMOI considera que o recoñecemento social da enxeñaría informática é insuficiente en España e que esta enxeñaría, que forma parte estrutural da sociedade da información, está chamada a asumir grandes responsabilidades sociais relacionadas coa implantación das novas tecnoloxías, o desenvolvemento sostible e a solidariedade internacional, "en resumo, co confort, o progreso e a esperanza,", engadiu. María Jesús Prieto-Laffargue destacou a continuación o alto recoñecemento social que xa teñen os enxeñeiros informáticos en países tan significativos como Corea, Malaisia, India ou Canadá.

Tamén explicou Prieto-Laffargue que a enorme complexidade do progreso actual demanda novos perfís académicos e profesionais das enxeñarías, xa que todas elas se deben acostumar a traballar unidas nos seus respectivos proxectos porque é preciso interactuar con coñecementos diversos para resolver problemas concretos. Engadiu que Europa vai necesitar moitos máis enxeñeiros informáticos nas próximas décadas e que os enxeñeiros egresados das actuais facultades están en gran parte desfasados por un déficit estrutural que afecta ás ensinanzas técnicas.

Por esta razón a FMOI proponse colaborar cos gobernos e axencias de acreditación para facilitar que todo aquel que se formara como enxeñeiro poida desenvolver o seu labor coas plenas garantías, achegando para iso a súa ampla experiencia, a representación significativa que exerce dos enxeñeiros de todo o mundo e o estatus non oficial de interlocutor ante as primeiras institucións internacionais, como Nacións Unidas, o Banco Mundial, o Fondo Monetario Internacional ou a Comisión Europea.

Sensibilización social

Durante o coloquio que se desenvolveu despois da conferencia abordáronse diferentes aspectos da problemática que afecta ao colectivo dos enxeñeiros informáticos en España. O profesor da FIUPM, Javier Soriano, pechou as intervencións destacando o acerto da visión global do que é e representa a enxeñaría informática achegada por María Jesús Prieto-Laffargue, así como das súas propostas para a sensibilización social sobre a importancia desta disciplina.

María Jesús Prieto-Lafrague foi presentada polo Decano da Facultade, Francisco Segovia, quen actuou de moderador. Entre os asistentes estaba así mesmo a presidenta da Conferencia de Directores e Decanos de Informática, María Ribera, así como os representantes de colexios de diferentes autonomías, da Asociación de Enxeñeiros en Informática (ALI) e decanos e profesores dunha quincena de universidades españolas.

María Jesús Prieto-Laffargue, que xa ocupaba unha vicepresidencia deste organismo mundial, foi elixida presidenta o pasado mes de novembro, polo que manterá responsabilidades na FMOI durante os próximos seis anos: dous como presidenta electa xunto ao Presidente Executivo Sr. Barry J. Grear (Australia); outros dous como presidenta executiva e dous máis como "Past President". Asumirá formalmente a presidencia en 2009 en Kuwayt. É a primeira vez que unha muller ocupa esta responsabilidade na FMOI.

María Jesús Prieto-Laffargue naceu en Salamanca e é enxeñeira superior de telecomunicación pola Universidade Politécnica de Madrid, así como diplomada en alta dirección de empresas polo IESE Navarra e no programa de intensificación Finanzas avanzadas na Universidade de Navarra. María Jesús Prieto foi xerente nacional de Telefónica Sistemas e presidenta do Instituto da Enxeñaría de España (2000-2004).