Imatia Innovation gaña o Premio Iniciativa Empresarial do CPEIG

Só queda pendente o fallo do Premio Proxecto Fin de Carreira, dentro dos galardóns que se entregarán na Noite da Enxeñaría en Informática de Galicia

Estatuíña Noite da Enxeñaría en Informática

Os colexiados que compoñen a xunta de goberno do Colexio Profesional de Enxeñaría en Informática de Galicia (CPEIG) decidiron outorgarlle o Premio Iniciativa Empresarial á empresa Imatia Innovation, en recoñecemento ao seu labor como unha das empresas tecnolóxicas europeas líder en innovación. Os responsables da firma recibirán o galardón dentro da celebración da Noite da Enxeñaría en Informática de Galicia, prevista para o 23 de novembro.

Fundada en 2005, Imatia Innovation ten a súa orixe como spin-off da Universidade de Vigo. É unha empresa tecnolóxica especializada no desenvolvemento rápido de sistemas de información e alta calidade, e recoñecida xa fóra de España. Este mesmo ano a editorial Red Herring incluíu a firma galega dentro da súa listaxe de referencia a nivel mundial de empresas, TOP 100 en Europa. Ese recoñecemento supón identificar a Imatia Innovation como unha firma nova con moito desenvolvemento futuro e con carácter emprendedor.

O CPEIG fará entrega dos seus premios anuais no transcurso da Noite da Exeñaría en Informática de Galicia, que este ano chega á súa cuarta edición. Será o 23 de novembro, nunha gala que representa un punto de encontro para os colexiados e colexiadas, e que conta coa participación de cargos empresariais do sector TIC e institucionais.

Galardóns

  • Premio Traxectoria Profesional: a título póstumo, Víctor Gulías, profesor, investigador e emprendedor.
  • Premio Iniciativa Emprendedora: LaconNetwork, evento de networking que reúne a emprendedores do sector TIC de Galicia baixo un paraugas informal pero moi estable.
  • Premio Proxecto Fin de Carreira: pendente de fallo.
  • Premio Iniciativa da Administración: Proxecto Coruña Smart City, en recoñecemento á aposta que o concello herculino está a realizar pola I+D+i e as novas tecnoloxías.
  • Premio Iniciativa Empresarial: Imatia Innovation.
  • Premio Ada Byron: a enxeñeira informática Luz Castro, como representante das mulleres líderes na adopción da tecnoloxía, e pola súa capacidade para mesturar coñecementos técnicos e visión social.